ស្របពេលដែលអ្នកលេងហ្វេសប៊ុកមួយចំនួនកំពុងប្រកាសស្រែកក្ដែងៗថាខ្លួនសុទ្ធសឹងតែជាអ្នកស្រលាញ់អភិរក្សវប្បធម៌ ប្រពៃណីជាតិ និងតែងរិះគន់ខ្វាយខ្វល់លើប្រទេសជាតិថាមិនសូវយកចិត្តទុកដាក់ថែរក្សាមរតកជាតិដូចទឹកបាក់ទំនប់នោះ ពេលនេះងាកទៅកាន់ប្រទេសភូមិរបងខ្មែរ គឺប្រទេសថៃ ដែលមានឈ្មោះដើមថាសៀមនោះ ពួកគេមិនសូវជាបញ្ចេញទស្សនៈ ឬគំនិតប្រៀបបានបណ្ឌិតតាមហ្វេសប៊ុក ឬបណ្ដាញសង្គមអ្វីឡើយ ដោយបានបង្ហាញបន្ថែមស្នាដៃផលិតនូវរូបគំនូរអុំទូកដែលរូបភាពទាំងនេះត្រូវបានមហាជនមើលឃើញថាជារូបដែលចម្លងចេញពីចម្លាក់ខ្មែរដដែល។ទន្ទឹមនឹងការចេញសាររិះគន់ពាក់ព័ន្ធការលួចចម្លងឥតចេះហត់នឿយរបស់ប្រទេសថៃ រហូតអ្នកខ្លះលើកជាចម្ងល់ថា គេធ្វើអ៊ីចឹងធ្វើអី បានអីមកវិញនោះ?
ទទឹមនឹងការឈឺឆ្អាលលើវប្បធម៌ជាតិនេះ លោក ឧកញ៉ា ស្រី ចាន់ថន បានសរសេរលើគណនីFacebook លោកផ្ទាល់បែបនេះថា( ខ្ញុំជាខ្មែរអង្គរ ខ្ញុំមានឧត្តមគតិ នឹងឆន្ទះ ព្យាយាម អត់ធ្មត់ !ប្រជាជនខ្មែរម្ចាស់ស្រុក យើងមិនអន់ទេ ! សូមកុំប្រៀបធៀបជាមួយគេ យើងមានចំណុចខ្លាំងរបស់យើងស្រាប់ គេគ្រាន់តែចំលង នឹងកែច្នៃ តែយើងមានលិទ្ធិភាព គ្រប់គ្រាន់ សូមបងប្អូនទាំងអស់ចូលរួម គាំទ្រលើកស្ទួយ ព្រោះយើងជាម្ចាស់ដើមនៃសិល្បះ នឹងក្បូក្បាច់រចនាពីបុរាណ ក្នុងនាមជាកូនខ្មែរមួយរូប ខ្ញុំនឹងត្រៀមដីតំបន់អភិវឌ្ឍវិហ៊ារសួគ៌ ចំនួន២០ហិចតា រៀបចំអភិរក្ស តំបន់ទេសចរណ៍បែបវប្បធម៍ ដើម្បីអោយបងប្អូនចូលរួមទស្សនា នឹងថែរក្សាវប្បធម៍ជាតិ ។
សូមពុកម៉ែ បងប្អូន ទាំងអស់ចូលរួមគាំទ្រ ជាពិសេស សូមបងប្អូន ដែលពាក់ពន្ន័នឹងវិសយ័ វប្បធម៍ អរិយ៍ធម៍ អាចសូមចូលរួមcomment នឹងដាក់ជាលេខទូរសព្ទ័ មកទាំងអស់គ្នា ដើម្បីសហការគ្នា ដើម្បីរកផ្លូវ នឹងកសាងទៅមុខ ព្រោះយើងជាពូជខ្មែរ ខ្លាំង មិនអាចចាញ់គេបានទេ ។
រួមគ្នាដើម្បីលើកតម្កើងកិត្យានុភាព នូវស្នាដៃរបស់កូនខ្មែរ លើឆាកអន្តរជាតិ ឲ្យកាន់តែច្បាស់ថា កូន ខ្មែរអាចធ្វើបាន រក្សាបាន ដ៏អស្ចារ្យ ៕)
ទោះជាយ៉ាងនេះក្ដីក៏គេពុំទាន់ឃើញមានស្ថាប័នពាក់ព័ន្ធណាមួយចេញមុខមកបញ្ជាក់ជុំវិញរូបភាពទាំងនេះនោះឡើយ បើទោះបីមានការលើកឡើងថាថៃបានចម្លងរបស់ខ្មែរក្ដី។