អធិការនគរបាលខណ្ឌមានជ័យ លោកវរសេនីយ៍ឯក ម៉េង វិមានតារា ច្រានចោលរាល់ការបង្ហោះរបស់ម្ចាស់អាខោន ឱសថស្ថានភ្នំទ្រទ្រង់ នៅលើបណ្ដាញសង្គម facebook ដោយបានចោទប្រកាន់ទៅលើលោកអធិការថា បានខលទៅគំរាមកំហែង។
បើតាមសេចក្តីបំភ្លើព័ត៌មានរបស់អធិការនគរបាលខណ្ឌមានជ័យ បានឲ្យដឹងថា លោកមិនបានខលទៅគំរាមកំហែងពាក់ព័ន្ធជុំវិញរឿងរ៉ាវជាមួយលោកម្នាក់នេះនោះទេ ហើយក៏មិនដែលធ្លាប់ស្គាល់លោកម្នាក់នេះដែរ។
ក្នុងសេចក្តីបំភ្លើព័ត៌មាន បានស្នើរឲ្យម្ចាស់អាខោនខាងលើលុបចេញជាបន្ទាន់នឹងធ្វើការបកស្រាយទៅកាន់មហាជនកុំឲ្យមានការភាន់ច្រឡំណាមួយឲ្យសោះទៅលើលោកអធិការ ខណៈគណនីហ្វេសប៊ុកឈ្មោះ “ឈឹម” គេស្គាល់ថាមានងារឧកញ៉ាដែលនោះ មិនព្រមស្វែងរកការពិតនៃម្ចាស់លេខនិងម្ចាស់សម្លេងដែលបានខលទៅគំរាមកំហែងលោកនេះឲ្យច្បាស់សិន ទើបលោកមកបង្ហោះចោទប្រកាន់ដោយគ្មានហេតុផលយ៉ាងដូច្នេះ។
លោក ម៉េង វិមានតារា មានប្រសាសន៍លើបណ្តាញសង្គមថា៖ ឈប់បានឈប់ទៅ សូមកុំយកឈ្មោះខ្ញុំទៅពាក់ព័ន្ធទៅរឿងរបស់អស់លោកអី។ ពេលវេលាខ្ញុំមានតម្លៃណាស់សម្រាប់បម្រើជាតិខ្ញុំ ពលរដ្ឋខ្ញុំ និងថ្នាក់ដឹកនាំ ខ្ញុំមិនចង់ចំណាយពេលវេលាអត់ប្រយោជន៍ជាមួយអស់លោកទេ។
លោក វិមានតារា បានបញ្ជាក់ថា ចំពោះម្ចាស់លេខ069 359757 ដែលបានអះអាងថា រូបគាត់ជាអធិការខណ្ឌមានជ័យ គឺខ្ញុំសូមបដិសេធន៍ទាំងស្រុងលើករណីនេះ។
ម្យ៉ាងវិញទៀត នៅក្នុងវីដេអូនេះ ម្ចាស់គណនីខាងលើ គឺបានទាញយកឈ្មោះលោកអធិការនគរបាលខណ្ឌមានជ័យ ជាច្រើនលើក ច្រើនសារ ឲ្យចូលមកពាក់ព័ន្ធក្នុងសាច់រឿងរបស់ខ្លួន ដោយទង្វើទាំងនេះ មានចេតនាធ្វើឲ្យប៉ះពាល់ដល់កិត្តិយស សេចក្តីថ្លៃថ្នូរ របស់ ម៉េង វិមានតារា និងកិត្តិយសរបស់កងកម្លាំងនគរបាលជាតិទាំងមូល ដែលបច្ចុប្បន្នកម្លាំងទាំងអស់កំពុងតែមមាញឹក យកចិត្តទុកដាក់ ក្នុងកិច្ចប្រត្តិបត្តិការរក្សាការពារសន្តិសុខសណ្តាប់ធ្នាប់សាធារណៈ និងសុវត្ថិភាពសង្គម ជាពិសេសក្នុងយុទ្ធនាការប្រយុទ្ធប្រឆាំងនឹងការឆ្លងរាលដាល នៃជំងឺកូវីដ-១៩ ។
សមត្ថកិច្ចជំនាញ កំពុងស្រាវជ្រាវរកម្ចាស់លេខទូរស័ព្ទ ដែលបន្លំខ្លួនជាអធិការខណ្ឌមានជ័យ ក៏ដូចជាម្ចាស់ផេកឱសថស្ថានបុរាណ ភ្នំទ្រទ្រង់ ដើម្បីចូលខ្លួនបំភ្លឺលើករណីបន្លំជាលោកអធិការនេះ៕
